有個家資源緊絀，住咗好多人。安排檢查照影像等等有時等好耐，嗰個叫公家。

有個家乜都有得照，話照就照，差在邊個埋單，嗰個叫私家。

係咪好穩陣，唔會delay診斷好易做呢？ 睇下以下例子。

一大清早返到醫院衫都未換 ，護士長就衝埋嚟

「醫生呀醫生，求下你啦，有三個投訴，我受夠喇，你自己搞掂佢啦。。。」

「咩投訴？」

護士長：「第一個上星期你睇佢肚臍位肚痛，無照到比佢走咗，跟著佢去咗第二度照，話盲腸炎喎。點知即晚穿埋，結果住咗成日星期醫院，佢話你delay咗investigation叫你賠返佢住耐咗醫院嘅醫藥費喎。」

「😱差得咁快，邊有得估呀，唔通個個肋骨以下盤骨以上痛都照CT咩。。。」

護士長 ：「你真係醒嘅啫長醫生，就係第二個投訴喇，係個病人嘅老公，收咗入院。」

「我記得呀，又係咁樣痛，差唔多一模一樣吖，我咪驚佢早期盲腸炎囉，不知幾咁醒😌😌 照咗CT無事呀，咪好囉，投訴啲乜？」

護士長：「佢投訴你CT無嘢」

「？」

護士長：「佢話你呃佢錢喎，無事又屈佢照」

「喂！！咁我驚miss嘢。。。」

護士長：「喂咩呀唔準喂！ 仲有第三個投訴呀，保險公司打咗50次電話嚟，問你有個case 撞親頭入院做乜會照咗OGD喎」

「又關我事？病人入到醫院先話佢胃痛，我問咗佢幾次話保險公司可能claim唔到，佢話一定得先照喎。。。」

護士長：「病人話佢無講過」

「。。。。。。😑😑😑即係又係我錯」

「仲有呢幾個case 保險搭單問埋，例如呢個case整親手指做咩驗血，嗰個肚痛又走去驗小便，呢個胃痛又走去照腸鏡。。。 你自己搞掂佢喇，今日唔駛睇症喇你！順便祝你聽日仲繼續有工返拜拜🌪🌪」 護士長一陣風就走咗

就係咁囉

家家有本難念的經

有錢又煩，無錢又煩

要撐起頭家，有啲難度，有啲技巧㗎😆

公立同私家，病人嘅要求有時好唔同，醫生需要嘅技巧亦都有啲唔同

有機會再分享～ 因為我而家要去搞投訴，唔得閒，走先🖐🤣🤣